AnandToday

પશુપાલનમાં નવી ક્રાંતિ... 

અમૂલની નવી પહેલ: દૂધાળા પશુઓની આનુવંશિક ક્ષમતા વધારશે આધુનિક ટેક્નોલોજી

ઓડ સિમેન સ્ટેશન ખાતે ગૌસોર્ટ અને GE-NOVA સેક્સ્ડ સીમેન લેબોરેટરીનું ઉદ્ઘાટન

દર  વર્ષે 1.4 મિલિયન સેક્સ્ડ સીમેન ડોઝ ઉત્પાદન કરવાની ક્ષમતા

આણંદ ટુડે | આણંદ
દૂધાળા પશુઓની આનુવંશિક ક્ષમતામાં વધારો કરવા માટેના મહત્વપૂર્ણ અભિયાન અંતર્ગત સોમવારના રોજ અમૂલ ડેરી, આણંદ દ્વારા સિમેન સ્ટેશન, ઓડ ખાતે અમૂલ ગૌસોર્ટ અને અમૂલ GE-NOVA સેક્સ્ડ સીમેન લેબોરેટરીનું ભવ્ય ઉદ્ઘાટન કરવામાં આવ્યું હતું. આ લેબોરેટરીનું ઉદ્ઘાટન અમૂલ ડેરીના ચેરમેન શ્રી સાભેસિંહ પરમારના વરદ હસ્તે કરવામાં આવ્યું હતું.
આ પ્રસંગે અમૂલ ડેરીના વાઈસ ચેરમેન શ્રી વિજયભાઈ પટેલ, એ.બી.એસ.-યુએસએના ચીફ ઓપરેટિંગ ઓફિસર શ્રી જીમ-લો, અમૂલ ડેરીના મેનેજિંગ ડિરેક્ટર ડૉ. અમિત વ્યાસ, જી.સી.એમ એમ.એફ.ના મેનેજિંગ ડિરેક્ટર ડૉ. જયેન મહેતા, અમૂલ ડેરીના નિયામક મંડળના સભ્યો, શ્રી કેવિન હલ (સપ્લાય ચેઇન સિનિયર ડિરેક્ટર), શ્રી દિનેશ રાવત (જનરલ મેનેજર – ઇન્ડિયા સેલ્સ એન્ડ સેલ્સ સપોર્ટ), શ્રી રાહુલ ગુપ્તા (રિજનલ ઓપરેશન્સ મેનેજર – પ્રોડક્શન) સહિત અમૂલ ડેરીના વરિષ્ઠ અધિકારીઓ અને કર્મચારીઓ ઉપસ્થિત રહ્યા હતા.
આ અવસરે અમૂલ ડેરીના મેનેજિંગ ડિરેક્ટર ડૉ. અમિત વ્યાસે સંઘના નિયામક મંડળને અમૂલના 1952થી શરૂ થયેલા સંવર્ધનના ઇતિહાસ વિશે માહિતગાર કર્યા હતા. તેમણે પ્રવાહી સીમેનના ઉત્પાદનથી લઈ આધુનિક આઈવીએફ લેબોરેટરી સુધી અમૂલ દ્વારા થયેલી પ્રગતિ અંગે વિગતવાર માહિતી આપી હતી.
ઉદ્ઘાટન કરાયેલ પ્રથમ લેબ અમૂલ ગૌસોર્ટ સેક્સ્ડ સીમેન લેબ છે, જે એનડીએસ-એનડીડીબીના સહયોગથી વિકસાવવામાં આવી છે. આ પ્રસંગે એનડીડીબીના સિનિયર જનરલ મેનેજર ડૉ. નિલેશ નાઈ પણ હાજર રહ્યા હતા. બીજી લેબ અમૂલ GE-NOVA સેક્સ્ડ સીમેન લેબ છે, જે એબીએસ જીનસ, યુએસએ સાથે ભાગીદારીમાં વિકસાવવામાં આવી છે અને દર વર્ષે આશરે 0.7 મિલિયન ડોઝ ઉત્પાદન કરવાની ક્ષમતા ધરાવે છે.
આ નવી સુવિધા દ્વારા દર વર્ષે કુલ 1.4 મિલિયન સેક્સ્ડ સીમેન ડોઝનું ઉત્પાદન શક્ય બનશે. અમૂલ સીમેન સ્ટેશન સી.એમ.યુ. એ-ગ્રેડ તથા આઈએસઓ-9001:2015 પ્રમાણિત છે અને તેની વાર્ષિક ઉત્પાદન ક્ષમતા 10 મિલિયન પરંપરાગત સીમેન ડોઝ અને 0.8 મિલિયન સેક્સ્ડ સીમેન ડોઝ છે.
હાલમાં અમૂલ મિલ્કશેડ વિસ્તારમાં પરંપરાગત અને સેક્સ્ડ સીમેનના લગભગ 1.5 મિલિયન ડોઝ સપ્લાય કરવામાં આવે છે તેમજ ભારતભરમાં વિવિધ સહકારી સંસ્થાઓ અને સરકારી એજન્સીઓને 6.5 મિલિયનથી વધુ ડોઝનું વિતરણ કરવામાં આવે છે. નવી લેબોરેટરી દ્વારા તૈયાર થનાર સેક્સ્ડ સીમેન માત્ર અમૂલના દૂધ ઉત્પાદકોને જ નહીં પરંતુ સમગ્ર દેશમાં વધતી માંગને પણ પૂરી પાડશે.
વિશ્વસનીય બોવાઇન જિનેટિક ભાગીદાર બનવાની પ્રતિબદ્ધતા સાથે અમૂલ ભારતને વૈશ્વિક ડેરી ઉદ્યોગમાં અગ્રણી સ્થાન પર પહોંચાડવાનો સંકલ્પ ધરાવે છે.