AnandToday

ગુજરાતના પશુપાલકોની મહેનતને મળશે પ્રોત્સાહન 

ગાંધીનગર ખાતે આજે શ્વેત ક્રાંતિના સર્જકોનું સન્માન થશે

રાજ્યના 565 શ્રેષ્ઠ પશુપાલકોનું થશે બહુમાન: ₹91 લાખથી વધુના પુરસ્કારો અપાશે

ગાંધીનગર સ્થિત નેશનલ ફોરેન્સિક સાયન્સીસ યુનિવર્સિટી ખાતે ‘શ્રેષ્ઠ પશુપાલક એવોર્ડ’ વિતરણ સમારોહ યોજાશે

પશુપાલન મંત્રી શ્રી જીતુભાઈ વાઘાણી તેમજ રાજ્ય મંત્રી શ્રી રમેશભાઈ કટારાના હસ્તે થશે શ્રેષ્ઠ પશુપાલકોને સન્માનિત કરાશે

આણંદ ટુડે | ગાંધીનગર
ગુજરાતની ગ્રામીણ અર્થવ્યવસ્થાની કરોડરજ્જુ સમાન પશુપાલન વ્યવસાયને વધુ વેગ આપવા અને પશુપાલકોના કૌશલ્યને બિરદાવવા માટે આજે તા. ૬ જાન્યુઆરીના રોજ ગાંધીનગર સ્થિત નેશનલ ફોરેન્સિક સાયન્સીસ યુનિવર્સિટી (NFSU) ખાતે ‘શ્રેષ્ઠ પશુપાલક એવોર્ડ’ વિતરણ સમારોહનું ભવ્ય આયોજન કરવામાં આવ્યું છે. આ પ્રસંગે રાજ્યના પશુપાલન મંત્રી શ્રી જીતુભાઈ વાઘાણી અને પશુપાલન રાજ્ય મંત્રી શ્રી રમેશભાઈ કટારા ખાસ ઉપસ્થિત રહીને વિજેતાઓને એવોર્ડ એનાયત કરી સન્માનિત કરશે.

આધુનિક ટેકનોલોજી અને પશુ સંવર્ધનની પરંપરાગત પદ્ધતિઓના સંગમ દ્વારા જે પશુપાલકોએ દૂધ ઉત્પાદન અને પશુ સ્વાસ્થ્ય ક્ષેત્રે નવા માપદંડો સ્થાપિત કર્યા છે, તેમને આ મંચ પરથી પ્રોત્સાહિત કરવામાં આવશે. રાજ્યના શ્રેષ્ઠ પશુપાલક પુરસ્કાર યોજના હેઠળ રાજ્ય કક્ષાએ પ્રથમ, દ્વિતીય અને તૃતીય ક્રમે આવનાર પશુપાલકોને એવોર્ડની સાથે-સાથે પ્રોત્સાહન માટે ક્રમશ: રૂ. ૧,૦૦,૦૦૦, રૂ. ૫૧,૦૦૦ અને રૂ. ૩૧,૦૦૦ની પ્રોત્સાહક રાશિ પણ એનાયત કરવામાં આવશે.

આ ઉપરાંત દરેક જિલ્લા કક્ષાએ અને તાલુકા કક્ષાએ પણ પ્રથમ અને દ્વિતીય ક્રમ મેળવનાર પશુપાલકોને પુરસ્કાર આપીને સન્માનિત કરવામાં આવશે. જેમાં જિલ્લા કક્ષાએ પ્રથમ આવનાર પશુપાલકને રૂ. ૨૫,૦૦૦ અને દ્વિતીય ક્રમે આવનાર પશુપાલકને રૂ. ૨૦,૦૦૦ની પ્રોત્સાહક રાશિ આપવામાં આવશે. તેવી જ રીતે, તાલુકા કક્ષાએ પ્રથમ ક્રમ હાંસલ કરનાર પશુપાલકને રૂ. ૨૦,૦૦૦ અને દ્વિતીય ક્રમ હાંસલ કરનાર પશુપાલકને રૂ. ૧૦,૦૦૦ની પ્રોત્સાહક રાશિ આપવામાં આવશે.

આમ, શ્રેષ્ઠ પશુપાલક પુરસ્કાર યોજના અંતર્ગત આવતીકાલે રાજ્ય કક્ષાએ વિજેતા બનેલા કુલ ૩, જિલ્લા કક્ષાએ વિજેતા બનેલા કુલ ૬૬ અને તાલુકા કક્ષાએ વિજેતા બનેલા કુલ ૪૯૬ પશુપાલકો મળી સમગ્ર રાજ્યના કુલ ૫૬૫ પશુપાલકોને કુલ રૂ. ૯૧,૦૦,૦૦૦થી વધુની પ્રોત્સાહક રાશિ એનાયત કરવામાં આવશે.

રાજ્ય કક્ષાના પુરસ્કાર (કુલ ૩ વિજેતા)

પ્રથમ ક્રમ: રૂ. ૧,૦૦,૦૦૦
દ્વિતીય ક્રમ: રૂ. ૫૧,૦૦૦
તૃતીય ક્રમ: રૂ. ૩૧,૦૦૦

જિલ્લા કક્ષાના પુરસ્કાર (કુલ ૬૬ વિજેતા)

પ્રથમ ક્રમ: રૂ. ૨૫,૦૦૦
દ્વિતીય ક્રમ: રૂ. ૨૦,૦૦૦

તાલુકા કક્ષાના પુરસ્કાર (કુલ ૪૯૬ વિજેતા)

પ્રથમ ક્રમ: રૂ. ૨૦,૦૦૦
દ્વિતીય ક્રમ: રૂ. ૧૦,૦૦૦

ગ્રામીણ અર્થતંત્રને વેગ આપવાનો પ્રયાસ

ગુજરાત હંમેશા શ્વેત ક્રાંતિમાં અગ્રેસર રહ્યું છે. આ એવોર્ડ સમારોહ માત્ર સન્માન નથી, પરંતુ અન્ય ખેડૂતો અને યુવાનોને પણ પશુપાલન ક્ષેત્રે વૈજ્ઞાનિક અભિગમ અપનાવવા માટેની પ્રેરણા છે. પશુ સ્વાસ્થ્ય અને દૂધની ગુણવત્તા જાળવી રાખતા પશુપાલકો માટે આ મંચ એક નવી ઓળખ ઊભી કરશે.

નોંધ -સમાચરમાં આપેલ તસવીર પ્રતિકાત્મક